Ingerlaqqiffiusumik ilinniakkat

Ingerlaqqiffiusumik ilinniagaq sunaava?

Ingerlaqqiffiusumik ilinniagaq ilinniagaavoq ilinnialernissamut piareersaataasumik iliniareernerpit kingorna aallartissinnaasat imaluunniit ilaanni aamma inuutissarsiummik naapertuuttumik ilinniagaqareernerpit kingorna aallartissinnaasat.

Ingerlaqqiffiusumik ilinniakkat agguarneqartarput sivikitsumik, akunnattumik sivisuumillu ingerlaqqiffiusumik ilinniakkanut.

Sooq ingerlaqqiffiusumik ilinniagaq toqqassavara?

Ingerlaqqiffiusumik ilinniarnikkut teoretiskimik misissueqqissaarnermillu tunngavilimmik ilinniagassaatit. Tassuunakkut ilinniakkat naammassillugu suliffittaarnialeruit inerisaanermi suliassat teoretiskiusut misissueqqissaarfiusullui suliarinissaannut piginnaaneqalissaatit.

Nunatsinni inuiaqatigiit inuutissarsiornerullu inerisarnissaannut peqataarusukkuit ingerlaqqiffiusumik ilinniagaq tunuliaqutaralugu suliffittaarnissamut amerlanernik periarfissaqalissaatit. Suliamuty tunngasutigut inerikkiartussaatit aammali inuttut inooqataanikkullu annertuumik inerikkiartussallutit.

Ilinniartunit suut ilimagisaappat?

Ingerlaqqiffiusumik ilinniakkami ilinniartutut sallerpaatillugu ilimagisariaqarpat ilinniarnertuunngorniarfimmut naleqqiullugu sulianut tunngasutigut annertunerusunik piumasaqarfigineqarnissat. Ilimagisaavoq tiiminut ilinniartitsiffiusunut piareersarsimallutillu pimoorullugu peqataasarnissat.

Ingerlaqqiffiusumik ilinniakkami pingaartuuvoq ilinniarnerpit akisussaaffiginissaa, aamma ilinniartitsinermut, suleqatigiinnernut soraarummeernernullu piareersartarnissat.

Ilinniartutut inuunermut apeqqutaavoq illit nammineq ilinniarnermut qanoq tunniusimatiginersutit. Aamma ilinniartorpassuarnut iluaqutaasinnaasarpoq inooqataalluarluni ilinniarnermi avatangiiserissaarnissaq, ikioqatigiissinnaaneq pingaartillugu.