Inunnik nalunaarsuiffik (Folkeregister)

Danmarkimi ilinniagaqarlutit najugaqalissaguit, kommunip nuuffigisavit inunnik nalunaarsuiffianut tikinnerniik ullut tallimat qaangiutsinnagit nalunaartussaavutit.

Nalunaanngitsoorneq mianersoqqussummik akiliisitsinermilluunniit kinguneqarsinnaavoq.

Sivikinnerusumik Danmarkimiissaguit, tikinnerniik ullut tallimat qaangiutsinnagit kommunip nuuffigisavit inunnik nalunaarsuisarfianut saaffiginnissaatit paasiniarlugu qanoq iliussanerlutit.

Nakorsaq

Inunnik nalunaarsuiffimmut allatsinerni nakorsarisassannik toqqaassaatit, siunnersuutigissavarpullu najugaqarfippit qanittuaniittumik toqqaassasutit. Napparsimaleraanni nakorsaatillu allagartaannik(recept) assigisaannillu pisariaqartitsileraanni nammineq nakorsarisamut attaveqartoqartarpoq. Sioqqullugu piffissamik inniminniinissat eqqaamasassavat.

Nakorsiarneq immikkullu ilisimasalimmut nakorsiarneq akeqanngilaq, nakorsaatilli naartunaveersaatillu akilerneqartarput. Anigorsinnaanngisamillu nappaateqaruit imaluunniit nakorsap psykologimut fysioterapeutimut assigisaannulluunniit innerssuuppatit Namminersorlutik Oqartussaniik aningaasartuutinnik matussusiiffigineqarsinnaavutit.

Pinartumik nakorsamik ikiorneqartariaqalerneq

Nakorsavit ammasarfiisa avataatigut nappariasaaruit, lægevagtimut sianissaatit. Nakorsarisavit telefoniani nammineq akisartumi normu paasissavat. Annertuumik akornuseruit skadestuemukarsinnaavutit imaluunniit Alarmnummer 112-imut sianerlutit.

Kingutilerisoq

Kingutileritinneq kingutillu nakkutiginerat Danmarkimi akeqarpoq. Danmarkimut atuariartunnginnerni Kalaallit Nunaanni kingutilerisumut misissortilluarnissat eqqaamassavat - aallannginnernilu kingutileritittariaqaruit siusinaarlutit isumagissavat.

Ilinniartunut tapiissuteqartarneq pillugu nalunaarusiaq naapertorlugu, ilinniartut pinartumik kingutileritittariaqalerneri Namminersorlutik Oqartussat akilersinnaavaat, kisianni naliginnaasumik kingutivit nakkutigineri kingutivillu salitsinneri akilertissinnaanngilatit.

Nammineq kingutilerisoq sorleq atussanerlugu aalajangerneqartarpoq. ”Ilinniartutoqqat” kingutilerisumik pitsaasumik siunnersuuteqarsinnaanersut paasiniaavigisinnaavatit.