Annaasaqarneq Aliasunnerlu

Qanigisamik inuunermi pingaarutilimmik annaasaqarneq misigissutsitigut artornartuuvoq.

Tamanna pisarpoq toqusoqartillugu, perululluni napparsimasoqartilugu, angajoqqaat avippata namminerluunniit avissimagaanni. Taakkua tamarmik annaasaqarnernik aliasunnernillu imaqarput.

Nalunngilluagaq peeruppat

Pisoq ataaseq peqqutigalugu inuuneq allanngortinneqarpat, inuunermilu toqqissisimaneq tassanngaannartumik allanngorpat, inuuninni arlalippassuartigut qajannartutut misigisinnaavutit.

Misigissutsinik sakkortuunik akerleriittunik paatsiveerusimaarnartunik sunnertittoqarsinnaavoq. Assersuutigalugu imatut:

  • Nikallunganeq aliasunnerlu
  • Kamanneq
  • Ujariatsineq maqaasinerlu
  • Anniarneq
  • Imminut pissutinneq
  • Oqiliallanneq
  • Aarlerineq ernumanerlu
  • isumatsanneq 
  • Imaqanngitsutut misigisimaneq
  • Annilaanganeq
  • Isumassaarunneq  

Ilinniagarmi? 

Siunissami toqqissisimasumik inuuneqaleqqilernissat aallaqqaammut takujuminaatsissinnaassavat.

Ilinniagaqarnerni eqqarsarluarsinnaajunnaarlutit, eqqaamaniarnerillu aamma pissusissamisuunngitsoq malugisinnaassavat. Immaqalu ataatsimut isiginnissinnaanerit ajornakusoornerulissaaq.

Annaasaqarneq aliasunnerlu assigiinngitsunik atorneqartarput. Inuit ilaat iparaasarput, ulluinnarnilu piumasaqaatinut malinnaasinnaajunnaarallarneq akueralugu. Allat misigissutsinik ajattuisarput assigiinngitsorpassuarnik sammisaqarniarnermikkut. Immaqalu taakkua paarlakaattumik atorneqartarput.

Qisuariarnissat inissalerlugulu piffissalissavat 

Misigissutsit qaffakaasut akuerinissaat allanullu oqaluttuarinissaat pingaaruteqarpoq. Pisunut annernartumillu annaasaqarninnut akuersaarnissat, qanigisanillu qiaqateqarlutillu alianartoq pillugu oqaloqateqarnissat pingaartuuvoq.

Aliasunneq katsorsaataavoq, aliasunnikkullu annaasaqarneq oqiliartuaartarpoq. Inuit ilaasa aliasunneq annertuutut annernarluinnartutullu malugigaangamikku misigiumanagu avaqqutaartarpaat. Immaqalu kisimiinniarsarilersarput, taasanilu misigissutsit artornartut iluminni alliartortissinnaavaat.

Misigissutsitit akuerissavatit takutillugillu. Oqalunnikkut, qianikkut, kamannikkut imaluunniit pinngorartitsillutit qalipaanikkut, taalliornikkut, nipilersornikkut allatulluunniit aniatittassavatit.

Aliasunneq misigissutsillu oqimaatsut annikilliartuaalissapput ilutigalugulu inuunermik nuannaaruteqarneq uteqqikkiartuaalissaaq. Maqaasisaqarunnaartoqarnavianngikkaluarpoq aliasukkunnaarnermillu isumaqanngilaq. Kisianni siusinnerusutulli initutigiunnaassaaq.

Kisimiinnginnissaq pingaaruteqarpoq 

Inuit ilaannut ilaquttanik, aappamik, ikinngutinillu qanigisanik aliasuummik atueqatiginninneq naammattarpoq. Ilaalli ikiorneqarnissamik kaammattorneqarnissamillu annertunerulaamik pisariaqartitsisarput. Immaqa ilaquttavit ikinngutivillu aliasunnerit inissaqartippianngilaat. Taamaattoqartillugulu ilinniarsimasunik ikiortissarsiornissaq pisariaqartarpoq.  

Ilinniarnertuunngornianik Siunnersuisarfimmi pisut, ajornartoorneq eqqarsaatillu tamatuminnga aallaaveqartut oqaloqatigiisutiginissaat neqeroorutigisarparput. Piffissaqartitsillutalu periarfissiisarpugut misigissutsinut qisuariarnissamut.

Una allagaq srg.dk isumassarsiorfigalugu allataavoq.