Imminut naleqartinneq

Imminut naleqartinngippallaarneq amerlasuunik misigineqartarpoq. Pissutaasut assigiinngittaqaat.

Periarfissaq ataaseq 

Ullumikkut ilinniagaqarnissamut amerlasuunik periarfissaqarpoq. Qangatut, angutaagaanni piniartunngortariaqarneq, arnaagaannilu piniartumut nuliaasariaqarneq pisariaarunniluuvoq. 

Tamatuma inuunermik qanoq atuinissamik toqqaasinnaanngorluta kiffaanngissusilerpaatigut - nalorninartorsiornermilli annertunerusumik kinaassutsimillu paasinninniarnissamik inuuneq naallugu ingerlasussamik aamma nassataqarpoq.

Inunnut allanut ilinnniarfigisamullu naleqqiulluni naleqartutut misigisimanissaq ajornakusoorsinnaavoq. Aappaqarluni, suliffeqarluni, ikinnguteqarluni ilaqutaqarlunilu eqqissisimasumik inuuneqaraluarluni qamuuna qularnermik peqartoqarsinnaavoq.

Qularneq

taamatut qinersisinnaassuseqartilluni aamma tunngaveqanngitsutut toqqissisimanngitsutullu misiginissamut qaninnerulernartarpoq.

Nammineq naleqassuseq inuit ilaanni qularineqalersinnaavoq.

  • Ilinniagara sapinngilara?
  • Ilinniagaqareeruma sulinissara sapissanngilara?
  • Inaarutaasumik suliassara pingaarneq imaluunniit specialera allassinnaanerpara?
  • Aappaqalerlunga inuullualersinnaanerlunga... ilaalu ilanngullugit?

Imminut naleqartinneq peroriartornermut attuumassuteqarpoq

Peroriartortillutit angajoqqaannik, atuarfimmiik ikinngutinnillu ajorisassaanngitsutut pineqarsimaguit imminut iluarisimaarnissat tunngavissaqarluartarpoq.

Ilaatigut imminut anniligalutit qularlutillu misigisimasinnaasarputit, erniinnarli ajorisassaanak qamuuna misigisarpat.

Akerlianilli ajorisassaanngitsutut naammattumik misigitinneqartarsimanngikkuit pisut annikitsunnguit peqqutigalugit ”uppissinnaasarputit” pisullu nuanninngitsut naleqanngisutsinnut uppernarsaatitut misigisimalerlugit.

Ileqqupalaanik pinngortoqarsinnaavoq, immaqalu misiginngisannik pisut inuillu imminut ajortutut isigininnik uppernarsaasinnaasut ujartulersinnaavatit.

Ileqqupalaaniik anillanniarnermi oqaloqateqarneq alloriaataasinnaavoq. Kiserluinnarmi taamatut inissisimasoraluni tamatigorluinnangajak misigisimanartarpoq, oqiliallaataasarporlu paasillugu allat aamma imminnut nalornisigisartut, kisivillu taamatut ajornartorsiuteqarnak.

Ilinniarnertuunngornianik Siunnersuisarfimmi oqaloqateqartarnikkut imminut naleqanngitsutut isiginerit sunik peqquteqarnersoq ilisimanerulersinnaavat, ajortumillu ingerlalernerup kipitinnissaanut ikiorserneqarlutit.

Ilinniarnerillu sammilluarnerulersinnaavat piginnaasatillu atorluarnerulerlugit.

Una allagaq srg.dk isumassarsiorfugalugu allataavoq.