Ilaqutariinni peroriartorfinni sumiginnaasoqarsimatillugu

Inuunerup ingerlanerani ajornartorsiuteqalernermut peqqutaasinnaavoq Ilaqutariinni peroriartorfiusuni sumiginnangaasimaneq.

Meeqqap tunngaviusumik toqqissisimanissamik, asaneqarnermik, illersorneqarnissamik sammineqarnissamillu pisariaqartitai naammattumik tunniunneqanngikkaangata sumiginnaaneq pisarpoq.

Ilinniagaqarniarnermi ajornartorsiortitsisinnaavoq, malinnaalluarsinnaagaluarluni ass. tatineqarnernut, misigissutsinut sakkortuunut, isornartorsiutinut aaqqiagiinngissutinullu qisuariartarnerit artorsaatigineqarsinnaapput.

Meeraanerup nalaani misigisat assigiingitsupput, sumiginnaanerit ilaqutariinni assiigiinngitsuni ersiutaat assigiittanngillat, soorlu aamma meeqqat assigiinnginnamik pisunut assigiikkaluanut qisuariaataat assiggiittanngillat.

Inersimasutut suut malugineqarsinnaappat? 

Ataani allassimasut tamarmik sumiginnaanermik tunngaveqartariaqanngillat. Misissuinikkulli takuneqartarpoq, meeraanerup nalaani sumiginnaagaanermik aqqusaagaqarsimagaanni ilaatigut attuumassuteqarsinnaasartut:

 

  • Imminut minnerutinneq - sullunartutut misigisimaneq
  • Inoqatit ajortuliornissaannut sillimaneq
  • Misigissutsinut sakkortuunut tinguarteqqajaaneq (ass. kamanneq, ersiorneq, assigisaallu.)
  • Killissanik malussarsinnaannginneq killiliisinnaannginnerluunniit.
  • Imminut allanullu innimiginninniarnikkut oqimaaqatigiinngitsumik pissuseqarneq.
  • Akisussaaffinnik oqimaaqatigiissaarisinnaassuseqannginneq (tingusivallaartarneq/sumiginnaavallaarnerluunniit)
  • Nakkanganermik, imaarunnermik kiserliornermillu misigisimaneq.
  • Imminut mattunneq
  • Isumakilliornissamut, annilaanganermut, imminornissamik eqqarsaatiteqalernissamut, atoqatigiinnermi ajornartorsiuteqalernissamut atornerluinermillu ajornartorsiuteqalernissamut nakkaqqajaaneq.

Aunngitsumik meeraasimalluni isumaqaraluarluni tamakkua misigineqarsinnaapput, soorlu aamma sumiginnangaasimatilluni artornartumik inuuneqartoqartariaqanngitsoq.

Illersuutit

Inuit qajannaatsuupput, isumalluutinillu periarfissaasunik atortuaallaqqissuullutik. Avatangiisinilu periarfissaqartillugu meeqqap pisariaqartitaasa ilaat naammassineqarsinnaasarput. Ukkuninnganniik pisinnaapput:

  • Aataakkut/Aanaakkut ilaquttalluunniit allat
  • Ilinniartitsisoq perorssasorluunniit 
  • Meeraanerup nalaani piffissaq iluamik ingerlaviusoq 
  • Inuusuttut klubbiat peqqissumik avatangiisilik, assigisaaluunniit 

Immaqa arlaannik ilinnut pitsaasumik sunniutilimmik eqqaasaqarsinnaavutit?

Illit ullumi

Meeraanermi pisimasut peeruminaattarput. Ullumerpiaq inissisimanerit - inersimasutut(immaqa inersimangattutut) aallavigalugu imminut takorlooriassasutit. Meeraanermiit suut nassatarinerlugit eqqaamaniarlugit, sorliit kipitittariaqarlugit sorliillu atorlugit ingerlaqqinnissaq pillugu killiffeqartarneq pissusissamisoorluinnarpoq. Inuuneq naallugu ineriartortoqartarpoq, meeraanerliorsimagaluarluni inuunerup sinnera tamaat ajortumik inissisimasoqartariaqanngilaq.

Oqaloqateqartarit 

Inuit ilaasa inoqatinut qanoq innertik oqaluttuarissallugu ajornakusoortittarpaat. Eqqarsaatinik misigissutsinillu oqaasinngortitsineq iluaqutaasarpoq. Ilaanni aallarniutaalluartarpoq ”maanna artorsarnerarluni” oqaannarluni. Inuit tatigisatit toqqissisimanartitatit ammaffigisinnaavatit. Aamma inuit apuussiviginissaat tamatigut pisariaqartanngilaq - eqqarsaatit misigissutsillu allaaseriinnarlugit ilaasa naamaagisarpaat.

Ilaquttat ikinngutillu immaqa misigissusileriffigineqarnissamut inissaqartitsisinnaanngillat. Taamaammat iliarsimasunik ikiortissarsiornissaq pisariaqartarpoq.

Oqimaatsumik peroriartorsimanerit peqqutigalugu ilinniarnerni ajornarnartorsiuteqaruit, oqaloqatigisarsinnaavatsigut.

Una allagaq srg.dk.-miit assilisaavoq.