Piumassuseqarnikkut ajornartorsiutit

Arlallit ilinniagaqarnermik nalaani atuariartornissamut angerlaallugilluunniit suliassanut piumassusaarunneq misigisarpaat.

Piumassusaarunnermik ajornartorsiuteqaruit, taamaatullu pissuseqarnernut  patsisaasunik eqqarsaateqarnissat paasiniaanissallu pingaaruteqarpoq.

Immaqa atuakkerinissamut piumassusaaruteriasaarninnut peqqutaasut arlaqarsinnaapput. Iluamik ingerlanerluni nalornisigalugu tunuarsimaartoqalersinnaavoq. Piumassusaarunnerlu allanut eqqartorsinnaajunnaarlugu.

Tamannali ajortumik ingerlanernertut isumaqartinneqartariaqanngilaq. Piumassuseqalernissannut sunniutaasinnaasunik siunnersuuteqarsinnaavugut.

Ilinniarfimmi

Ilaanni atuarfimmi pissutsit aalajangersimasut atuariartornissamut atuakkerinissamulluunniit piumassusikilliortissinnaavaatsit: 

  • Maannarpiaq faginik soqutiginngisannik sammisaqarpit?
  • Fagit allanik unamminarnerusut sammivigit?
  • Ilinniartitsisummi?
  • Atuaqatitit ilinniaqatitilluunniit qanoq attaveqarfigaagit?
  • Ilinniartuungornermi eqqarsaatigisatit naatsorsuutigisatillu piviusumut naleqqiullugit allaaneruppat

Maannarpiaq qanoq inuuneqarpit? 

Inuunermi pissutsit assigiinngitsut peqqutigalugit aamma piumassuseqarniarneq ajornartorsiutaasinnaavoq.

Maqaasineq
Immaqa ilaquttatit, aappat ikinngutiginerpaasalluunniit illoqarfeqatigiunnaarsimavatit. Ilaannikkullu maqaasivallaarneq peqqutigalugu ilinniagaqarnissaq tunulliuteqqajaaneqartarluni. Maluginiartassavat suna maqaasinerlugu aamma sooq ilinniakkamik naammassisaqarnissamut kissaateqarninnut suna tunngaviginerlugu.  

Allat piumasaat
Ilaanni angajoqqaat ilaquttalluunnit aalajangersimasumik ilinniagaqaqqusinerat piumassuseerunnermut peqqutaasarpoq. Piumassuseq namminerminiinnani avatangiisiniillunili. Tassani pingaaruteqarpoq ilisimassallugu ilikkassallugulu nammineq suna piumasarinerlugu. Ilaquttanik pakatsisitsissagaluaraanniluunniit.

Suliarisariaqakkat
Inuunermi allannguutit annertuut pisimasullu sakkortuumik sunniuteqartut misigisimagaanni piumassusaaruttoarsinnaavoq, atuarfimmilu suliasanut nukissaqaqqilissagaanni tamakku suliareqqaartariaqartarput.

Piumassusaarussimaneq ilinniakkaut tunngasumik nalorninermik nassataqarsinnaavoq, piumassusaarussimanerilli kukkullutit ilinniakkamik toqqaasimanernik isumaqartariaqanngilaq.

Assersuutigalugu imminut imatut aperisinnaavutit:

  • Sooq ilinniakkamutuunga qinnuteqarpunga?
  • Sooq pissanganartissimavara?
  • takorluukkakka allanngorsimappat, imaluunniit suli una anguniarusuppara?
  • Arlaannik ilinniarfimmi inuuninniluunniit piumassutsinnik maannakkorpiaq ”assersuisoqarpa”?
  • Siunissamut pilersaarutikkaa suuppat?

Oqaloqateqartarit 

Qanoq innerit pillugu allamik oqaloqateqartarnissat pingaaruteqarpoq. Ilaquttat ikinngutillu tassani iluaqutigilluarsinnaavatit, kisianni ilinniartunik aqqutissiuisoq aamma oqaloqatigisarsinnaavat imaluunniit Ilinniarnertuunngornianik Siunnersuisarfik attaveqarfigisinnaavat siunnersuisartuttalu ilaat oqaloqatigalugu.

Piumassuseqarnerit maannarpiaq inuunerisannut attuumassuteqarnersoq, qanorlu ilillutit ingerlariaqqissinnaanerit misissorsinnaavarput.

Una allagaq srg.dk-miit assilisaavoq.