Eqqarsarluarsinnaajunnaarnerit

Inuit tamarmik atuartitaanerup nalaani angerlarsimalluniluunniit ilinniakkerinerup nalaani eqqarsarluarsinnaajunnaarnermik nalaataqartarput.

Eqqarsaatit allamiissinnaapput

Klassissinniillutit ilaannikkut qanoq oqaluttoqarneranik paasisaqanngitsoorlutit misilissimassavat. Allarluinnarnik eqqarsaatigisaqarlutit misigisimassavat.

Atuarniartillutit imaluunniit suliassamik allanniartillutit mobiilernut, facebookimut, tv-mut errortanulluunniit tinguarteqaajaasinnaasarputit, eqqarsaatigaluguluunniit aqagu suut atuarfimmi sammissanerlugit.

Qanoq ilisukkut eqqarsaativit atuarnernut ilinniakkerinernulluunniit sammiunnaarlutik sumiittarneri maluginiartalerukku imminut ilikkarnerulissaatit.

Allamut saattoornerit 

Ilinniakkeriniartilluni allamut saattoortarneq naliginnaasupilussuuvoq. Pissusilersuutigisakkanik sungiussinissaq suliassanillu piffissaq eqqorlugu naammassisassanik ukkataqarsinnaanermut piginnaasaqalernissaq ilinniartutut ilikkagassanut ilaaginnarput. Eqqarsarluarsinnaaneq siuarsarumallugu imatut iliortoqarsinnaavoq:

  • Angerlarsimaffimmi eqqarsarluarsinnaanngikkaanni suli atuarfimmiitilluni suliassanik naammassinnereernissaq.
  • Akornusiisinnaasut errugassat/errortassat/playstation/tv assigisaallu piiartassavatit.
  • Suliassatit angumeriniagassatit pilersaarusiortassavatit. Sapinngisamik piviusorsiorlutit anguniagalersortassaatit.
  • Unikaallalaartassaatit. Tassani facebook alakkarlugu pujortariarlutilluunniit allamulluunniit saassinnavutit.
  • Nalorsaleraangavit atuaqatitit aperisarsinnaavatit imaluunniit suliassap tullianut ingerlaqqillutit. Uterfigeqqikkukku allatut suliarisinnaanngorsimassavat.
  • Sinilluartarnissat isumagisassavat. 

Sakkortuunik misigisaqartarnerit 

Ilinniarnermik sammisaqarluarsinnaajunnaartoqarsinnaavoq sakkortuunik misigisaqarsimagaanni. Qanittumi imaluunniit siusinnerusukkut pisimasinnaapput. Misigisat taamaattut misigissutsinik aqussinnaanngisanik aallartitsigaangata atuarnerup nalaani eqqarsarluarsinnaanermut akornusersuutaasinnaapput. Tamakkua pillugit oqaloqateqartarneq iluaqutaasarpoq.

Eqqarsarluarsinnaajunnaartarnermik ilinniagaqarninnut akornutaasumik ajornartorsiuteqaruit oqaloqatigineqartarnissannik neqeroorfigisinnaavatsigit. Ukkataqarluarsinnaanerit maanna inuunernut attuumassuteqarnersoq misissorsinnaavarput, qanorlu iliuuseqarluni qaangerniarneqarsinnaanersoq aamma aqqutissarsiuussinnaavarput.

Una allagaq srg.dk-miik issuagaavoq