Angajoqqaat

Inersimasunngornermi angajoqqaanut pissuseq allanngortarpoq.

Ilinniariarlutit illoqarfimmut allamukarsimasinnaavutit, angajoqqaannullu pissuserisat qangamiik  allaanerulersoq maluginialerlugu.

Pissusissamisoortumik avissaariartorneq 

Inersimaleriartornermi angajoqqaanik pinngitsuuisinnaaneq milliartortarpoq. Nammineernerulerit ilutigalugu angajoqqaatit inuuninni allaanerusumik inissisimalissapput, angajoqqaavillu iperariartuaalissavaatsit.

Ukiut arlallit ingerlanerini, ilaatigut angajoqqaanut inuusuttumullu misigissutsitigut ilungersuanalaartarsinnaagaluartoq, ajornartorsiutitaqarpiarani nikikkiartuaartoqarsinnaavoq.

Pissusissamissuuginnarpoq nikikkiartuaarnerup nalaani akerleriittunik misigissuseqartarneq. Angajoqqaanniik avissaarnissat kissaatigigalugulu illuatungaatigut qanoq pisoqasaanersoq annilaanngatigisinnaavat. Sungiusimasavit allamillu misileerusunnerup akornanniillutit nalornilersinnaavutit. Tassunga killinnerni aalajangersinnaajunnaarnermik, annilaanganermik ernummateqaqarnermillu misigisaqarsinnaavutit, kisiannili aamma pissanganartutut enrumanartutullu misigisinnaavat.

Avissaarneq ajornartorsiutitaqaraangat 

Ilaatigut avissaarniarnermi ajornartorsiutinik pilersoqartarpoq. Tamanna misigineqarsinnaavat angajoqqaanniik avissaarniarnerit artornaraangat, imaluunniit angajoqqaavit iperaaniarnertik artorsaatigigaangassuk.

Immaqa angajoqqaannut atavallaartutut imminut misigisimasinnaavutit, malugisinnaallugulu takorluukkannut, ikinngutinnut, aapparisannut angajoqqaannulluunniit attaveqarninnut malunniutaasoq.

Namminersorlutit aalajangiiniartillutit angajoqqaatit annilaanngateqartut ernumagisaqartulluunniit immaqa malugisinnaassavatit.

Angajoqqaanik isumaginnittussatut akisussaaffeqalersimagaanni 

Avissaariartuaarneq ajornartorsiutitaqalersinnaavoq angajoqqaat meeqqaminnik tapersersorneqarnissamik, isumassuinermilluunniit pinngitsuuisinnaanngikkaangata, assersuutigalugu tarnikkut nappaateqarneq imaluunniit atornerluisuuneq peqqutigalugu. 

Angajoqqaat atugarissaarnissaat ilaqutariinnissinni akisussaaffigilersimallugu inissisimasutut misigisimaguit. Nammineq imminut akisussaafigalutit inuuneqalernikkut angajoqqaavit qanoq atugaqalernissaat immaqa ernummatigisinnaavat. Immaqa illit ukiunnut naleqqutinngitsumik angivallaamik akisussaaffilerneqarsimassaatit. Immaqa qatannguternik nukarlernik ilinniariarlutit aallarnikkut sumiginnaasutut misigisimasinnaavutit.

Nammineq inuunerit ingerlanniartillugu angajoqqaatit pillaaniartutut akuersaanngitsutullu misigisinnaavatit, tamannalu peqqutigalugu pissutitaasutut misigisimalersinnaavutit

Angajoqqaatit illit sinnerlutit takorluugaqarpallaarpata 

Angajoqqaat ilaat namminneq inuunerminni anguniakkatik piviusunngortinngitsoorsimasatik meeqqaminnut anguniagassiissutigisarpaat. Taamaattoqartillugu pinngitsaaliiniarnermik, annertuunik piumasaqaaateqarneq ingasattajaartumillu inuusuttup inuuneranut soqutiginninneq pilersarpoq.

 Angjoqqaavit piumasaat illillu nammineq piumasavit suuneri qanorlu inuuneqarumanerlutit aalajangeruminaatsilersinnaavatit.

Ajornartorsiutit annertuallaamik ilinniagaqarnernut pitsaanngitsumik sunniuteqalerpata oqaloqatigineqarnissat neqeroorutigisinnaavarput.

Oqaloqatigiittarnikkut ajornartorsiutit suussusersillugillu peqqutaasut qulaajaaffigineqarsinnaapput, siunertaqarnerusumilli suliarineqarsinnaanngussallutik.

srg.dk isumassarsiorfigalugu una allataavoq.