Annilaanganeq

Annilaanganeq akornusiisarpoq, taamaammallu atugarissaarnissaq kiffaanngissuseqarnerlu sunnertarlugu. Annilaanganermut peqqutaasut assigiinngitsuupput.

Annilaangasarneq pissusissamisoorpoq 

Inuit tamarmik annilaanganermik misigisaqartarneq nalunngilaat. Nalugaluarlugu sooq taamaannerluni eqqisisimanngitsoqarsinnaasarpoq, iluaalliorluni, eqqasuuteqarluni ersigisaqarluniluunniit. Inuup annanniarnissamut pinngortitaassutsiminik pissuserisaanut ilaaginnarpoq. Ulorianartorsiornerniik aniguiniarsinnaassagatta taamatut qisuariartarnermik pissuseqarpugut. Qisuariarsinnaassuseqarniassagatta qaratsatta iluani pinngorsimavoq - iliuuseqarnissatsinnut qimmaanissamulluunniit iluaqutigaarput.

Annilaanganeq aqukkuminaappoq

Annilaanganerup tinguaasimanera inuunermilu initoorujussuartut inuit ilaasa misigisimasarpaat. Eqeersimaartumik isumalimmillu inuuneqarnissaat akornuserlugu takussinnaasarpoq. Ilaatigullu akimmisaarutigivallaartillugu inuunermi ingerlaqqinniassagaanni katsorsartinnissaq pisariaqalersarluni.

Ersiutaasut ilaat

  • Timikkut ersiutit ukuusinnaapput: Ipiannguneq, uummammik kassuttoorneq, kiagunneq, assaat sajunneri, timikkut nipikkulluunniit sajunneq, sakkissakkut anniarneq naakkulluunniit pissangasutut misigisimaneq. Ersiutit ataavartuusinnaapput, sinnarliulernikkut, ilukkut eqqissisimajunnaarnikkut, nerisassanik nakerisaarunnikkut timminnikkullu.
  • Ajunaarnersuarnik takorluukkanik eqqarsaqqajaasoqarsinnaavoq, taartuinnarnik eqarsartoqarluni. Aamma eqqaamaniarnikkut ukkataarniarnikullu ajornartorsiuteqartoqarsinnaavoq.
  • Iluaatsumik misigisimanertut malunnarsinnaasarput, tunuatungaani misigissutsit maluginiaruminaallutillu ilisariuminaassinnaasarmata annilaanganerup qalliisimanera peqqutigalugu. Misigissutsit: kamanneq, imminut annikigineq, anniarneq sumiginnangaasutullu misigisimanerit, annilaanganerup aallaavigisinnaavai.

Ilinniarnertuunngornianik siunnersuinitsinni ilinniartut ukunannga ilaatigut ajornartorsiutillit siumortarpagut:

Inuit amerlasuut akornanniinnissamut ersineq

Qanittuaqqamik tapersersuisumillu attaveqarnissamik pisariaqartitsinerujussuaq inuit amerlasuut akornanniinnissamut ersissuteqarnermut peqqutaasinnaavoq. Inuttut sammisaqaqatigiinnernut peqataanaveersaaruit imaluunniit inuit amerlasuut akornanniikkaangavit iluatsumik misigisimasaruit, inuit amerlasuut akornanniinnissamut ersigisaqarsinnaavutit.

Piginnaasanik takutitsinissamut annilaanganeq

Piginnaasanik takutitsineq, imminut nalilersorlutillu isornartorsiornertalimmik isumaqartippat. Tassunga annilaanganeq; sianiitsutut, atorsinnaanngitsutut nalikinnerusutullu paasisaanissamik imminullu piumaffiginninnermik allallu naatsorsuutigisaannik naammassinnissinnaannginnermik takorluugartaqartikkukku.

Inuit akornanni oqalunnissamut ersissuteqarneq aamma assersuutigineqarsinnaavoq. Allattariarsornermi suliassamik naammassinninnissamik annilaanngateqarneq misilitsinnissamullu annilaanganeq.

Misilitsinnissamut annilaanganeq

Inuit ilaat militsinnermik eqqatinneqaannarlutik tilleruluttuulersarput. Misiltsikkuma qanoq issaanga, dumpissaanga, karakteerikka naammassappat, uannut piumasaqaatikka sapinngilakka? Pisassat naammattumik sapinngilakka?

Siunissamut annilaanganeq

Inuuninni allanngorfiusup allamullu ingerlariaqqittariaqalerfivit nalaani taamatut misigisinnaavutit. Siunissami piumasaqaataasinnaasunik eqqarsaatit, soorlu ilinniakkamik sapersarani naammassinnissinnaanissamik, suliffigiligassallu piumasaqaataanik naammassinnissinnaanissamut eqqarsaatit, aappaqarlunilu meeraqalernissamik eqqarsaatit annilaangassutigineqalersinnaapput.

Annilaanganerit ilinniagaqarninnut akornutaappat, oqaloqatigiittarnissanik neqeroorfigisinnaavatsigit.

Annilaangerit maanna inuunerisannut attuumassuteqarnersoq misissorsinnaavarput. Peqqutaasut paasineqarsinnaatillugit iliuuseqarsinnaaneq ajornannginnerusarpoq, taamaalilluni namminerisannik annilaanganernut iliuuseqarsinnaanerit misigisinnaanerussagakku.

Periutsinik annilaanganernut millisaataasinnaasunik aamma ilinniartissinnaavatsigit.

Ilinniarnertuunngornianik sunnersuisarfimmi nappaatinik suussusersiuneq ajorpugut. Annilaanganerpit ersiutai nakorsamut misissortikkusukkukkit nakorsamik takuneqarnissannik inniminniisariaqarputit.

srg.dk isumassarsiorfigalugu una allataavoq.