Danmarkimi højskolerneq

Danmarkimi højskolernermi inooqatigiinnermi inuttullu piginnaasanik ineriartortitsinissaq periarfissaqarluarpoq.


Højskoli atuarfiuvoq pituttorsimanngitsoq naliginnaasorlu. Taamaammat aalajangersimasunik fageqaranilu atuartitsissutissanik aalajangersaavigineqanngilaq. Nammineerlutit fagit sorliit sammerusunnerlugit aalajangersinnaavat. Qanorlu ingerlaqqinnissamik Højskolimiinneq eqqarsarfigissallugu naleqquppoq. Suniarnerlutit nalunngereerukku atuaqqinnissannut aamma piareersarfigilluarsinnaavat.

Højskolimiinneq qaammatinik 6-niik 10-nut sivisussuseqartarpoq, augustillu aallartinnerani imaluunniit januarip aallartinnerani atuarneq aallartittarluni. Højskolini ataasiakkaani atuarneq oktoberip qiteqqunnerani aallartittarpoq.

Danmarkimi højskolit pillugit paasissutisat ataatsimoorussamik nittartagaanni takusinnaavatit.

Malugiuk, nammineerlutit aallaassaguit imaluunniit najukanni Majoriaq aqqutigalugu qinnuteqaateqaruit piumasaqaatit assigiinngimmata. 

Piumasaqaatit 

Danmarkimi højskolini ilinnialernissamut piumasaqaataavoq:

  • Atuartitsinermi malinnaassutaasinnaasunik qallunaatut atuarsinnaanermik allassinnaanermillu piginnaasaqassasutit.
  • Imigassamik aanngajaarniutinillu atornerluinermik ajornartorsiuteqassanngilatit.

Højskolimiinnerni atuaqatitit atuarfimmi najugaqatitgisussaavatit. Akunnerni 24-ini  inuusuttoqatitit ilagiuartussaavatit. Ilaquttavit illoqarfivit nunaqarfivilluunniit qimannissaat piareersimaffigisussaavat. Nammineq højskolimilu atuaqatinnut akisussaassuseqartumik pissuseqarnissat aamma piareersimaffigisussaavat.

Aningaasanut tunngasut 

Ilinniagaqarfiit allat assiginagit Højskolimi atuarneq akeqarpoq. Højskolimiinneq imminermini sapaatip-akunnaranut 900-niik 1700 kruuninut akeqartarpoq. Tamatumalu saniatigut akilerneqartussaapput:

  • Ilininniarnermi atortut 
  • Paasisassarsiorluni feriamilu angalanerit 
  • Ilinnianermut akiliut

Namineerlutit atuariartussaguit, Danmarkimut angalaneq højskolernernullu aningaasartuutit tamaasa nammineq akilissavatit.

Najukkanni Majoriaq aqqutigigukku, ilinniagaqarnersiatit atorlugit højskolimiinnerit akilerneqassaaq. Atualernissamik nalunaarnermut akliliut najukkanni Majoriamik akilerneqassaaq. Atuarfinni amerlanerni 300 kruuninik sapaatit akunneranut kaasarfimmioqartitsisarput, ilaatigut atuarnermi atortussannut atugassanik. Aallartinnak ilinniarninnut aqqutissiuisullu isumaqatigiissuteqarfigissavarsi atuarnerup aallaqqaataani paasisassarsiorlutit feeriamilu angalanissatit kia akilissanerai. Nammineerlutit akiliissaguit paasisassarsiorluni angalanissamut tapiiffigineqarnissaq Majoriaq aqqutigalugu qinnuteqarsinnaavutit.

Qinnuteqaasiorneq 

Danmarkimut angalanerit højskolimiinnissallu nammineerlutit akilissagukkit, højskolip qinnuteqarfissiaa immersussavat højskolemullu atuarfigiumasannut nassiullugu.

Danmarkimi højskolimiinnissat tassungalu angalanissat akilersinnaanngikkukku, najukkanni Majoriamut saaffiginnissinnaavutit. Tassani ilinniakkanut aqqutissiuisorlu højskolernissat pillugu iliuusissamik pilersaarusiussaasi. Iliuusissamik pilersaarusiaq ilinniagaqalernisannik anguniakkavit   ingerlanissaanik pilersaarusiaavoq. Maluginiatariaqarpat Majoriap inunnik højskoliliartitsisarnera killilerujussuummat, aallarnissallu qulakkeersinnaanngilat.

Majoriaq aqqutigalugu qinnuteqaruit, højskolinut Danmarkimiittunut tamanut qinnuteqarsinnaanngilatit. Majoriami aqqutissiuisup højskolinut sorlernut qinnuteqarsinnaanersutit oqaluttuutissavaatit.