Ilinniakkamik toqqaaniarnerminni elektroniskiusumik siunnersorneqarsinnaalerputit

Maanna inuusuttuaqqat aamma inersimasut ilinniakkamik toqqaaniarnerminni elektroniskiusumik siunnersorneqarsinnaalerput sumiikkaluarunilluunniit

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisup nuannaarutigalugu nalunaarutigissavaa Nuna Tamakkerlugu Ilitsersuisarfiup 1. februar 2020 nal. 10.00 eVejlledning, inuusuttuaqqanut aamma inersimasunut tamanut saaffiginnittoq, ilinniartitaanernut siunnersorneqarnissamik pisariaqartitsisunut neqeroorut ammassammagu.

Ilinniartitaanernut tunngasuni apeqqutini periarfissaalersimavoq allaqatigiittarneq - chatte – ertarneq, oqaloqateqartarneq aamma mail-kkut marlunnik oqaasilinnik attaveqarneq.

”Suliniut manna nutaaq aqqutigalugu Nuna Tamakkerlugu Ilitsersuisarfiup ilitsersuisarnini /siunnersuisarnini nukittorsassavaa, aqqutissiuusseqataaffigalugulu inuusuttuaqqat aamma inersimasut suli amerlanerusut takorluukkaminnik ilinniagaqartarnissaat. Neriuppunga amerlasuut periarfissamik atuisarumaartut, ilitsersuisartunullu eVejledning-imiittunut attaveqartarumaartut, ilinniakkamullu toqqarusutaminnut atatillugu ilitsersorneqartarumaartut” – taama oqarpoq Naalakkersuisoq Ane Lone Bagger.

Anguniagaavoq ilinniagaqarnissanut qinnuteqarniartunut attaveqarsinnaanerup annertunerulersinneqarnissaa, ilinniagaqarniartut Qitiusumik Ingerlatsivimmut Majoriamut ornigunnissaminnut periarfissaqanngitsut ilitsersuisartumit ilitsersorneqarnissamut allatigut periarfissaqartinneqalernerisigut. Qarasaasiatigut - eVejledning – aqqutigalugu ilinniartitaanernut ilitsersuisalernissami anguniagaavoq kikkut tamarmik – nunaqarfimmiuniit illoqarfinni annerusuni najugalinnut annertusisamik neqeroorfigineqarnissaat, maanna ilitsersorneqartarnermik periarfissaareersunut ilassutitut.

eVejledning tassaavoq suliniut ukiuni marlunni ingerlasussaq, siunertaralugu inuusuttuaqqanik aamma inersimasunik illoqarfinni aamma nunaqarfinni tamani najugaqartunik ilinniartitaanernut sammisumik siunnersuisarneq.

eVejledning pillugu annerusumik paasisaqarit ugguuna www.aqqut.gl

Annerunerusunik paasisaqarumaguit attavigiuk Ilinniartitaanernut siunnersorti Naja Lyberth-Klausen, mail naly@nanoq.gl.