Ilinniartunut inissiamik tunineqarneq

Qinnuteqarneq
Nittartagaq aqqutigalugu pisarpoq. Uppernarsaatit naapertuuttut ilanngullugit nassiunnissaat eqqaamajuk, soorlu ilinniarfimmiit allakkat aamma Ilinniagaqarnersiuteqartitsivimmit (USF) uppernarsaat. Sapinngisamik piaarnerpaamik, kingusinnerpaamillu Nuummut nuunnissat sapaatip akunneri sisamanik sioqqullugu, inissamik qinnuteqassaatit.

Ineqarnermut akiliut akiliisarnerlu
Ineqarnermut akiliutissap annertussusaa Inatsisartunit Aningaasanut Inatsimmi aalajangersarneqartarpoq.
2016-imi qaammammut akiliut tassaavoq inersimasumut ataatsimut kr. 850,00.

Akiliinngitsoornerit
Ilinniagaqartoq KAF-imut ineqarnerminut akiliutissaminik akiitsoqarpat, akiitsut akilerneqartinnagit ilinniartunut inissamik tunniussisoqassanngilaq. Qulaani pineqartup kingunerisinnaavaa ilinniartup ilinniarfini aqqutigalugu inissarsiortariaqarnera, imaluunniit kommuniminut utimut bilitsisisariaqarnera.

Tikinneq
Nuummut tikitsinnak ilinniartut najugaqarfianni inissaqarnerlutit qularnaaqqaaruk. Suli inissamik tunineqariarnak tikissaguit inissaqassanngilatit. Aamma qularnaassavat ilaqutariunnakkatit ilanngullugit ineqarnissannik akuerisaasimanerlutit, taakkua ilaassappata. KAF-ip neriorsuutigisinnaanngilaa ilinniarnerpit nalaani meeqqatit aappalluunniit ilanngullugit inisssaqartinneqassanersut.

Ulloq angerlarfik
Ullormi aallarfinni kingusinnerpaamik nal. 10:00 inigisat qimareersimassavat.