Oqaatsit

GUX-imi ilinniartitsinermi qallunaatut imaluunniit kalaallisut oqaluttoqarnera nikerartarpoq.

Ilinniartitsinermi oqaatsinut atorneqartunut ilinniartitsissutip suunera aamma ilinniartitsisoq kinaanersoq apeqqutaasarpoq. Akutsunngitsumik malugisarparput GUX-imi ilinniartunngorlaat ilinniartitsinermi qallunaat oqaasiisa atorneqartarnerat tupaallaatigisaraat.  

Taamaattumik pingaaruteqarpoq piareersimaffigissallugu imaassinnaasoq siornatigut pisarnernut naleqqiullugu qallunaatut oqalunnerunissat. Immaqa GUX-imi aallartinngitsiarninni qallunaat oqaasiinik atuinermik sungiusalaarnissaq iluaqutigisinnaavat.

Oqaatsinik ilinniartitsinermi oqaatsit atorneqartussat aalajangigaareerput, kisianni amerlanertigut ilitsoqqussaralugit oqaatsinnik tapertaqarnissat akuerineqarsinnaasarpoq.

Ilinniartitsissutini kalaallit kulturianut tunngassutilinni ammerlanertigut kalaallisut oqaluttoqartarpoq. Ilinniartitsissutini ataasiakkaani ilinniartitsisoq qallunaatut oqaasiliuppat ilinniartitsineq qallunaatut ingerlanneqassaaq.

Ilinniarnertuunngorniarfik oqaloqatigisinnaavat ilinniartitsinermi oqaatsinut atorneqartunut tunngassutillit annertunerusumik paasisaqarfigerusukkukkit.