Pre-IB

Pre-IB tassaavoq ukioq ataaseq piareersarfik ilinniartunut ukununnga naatsorsuussaasoq:

  • Danmarkimi Nunatsinniluunniit taamaallaat meeqqat atuarfianni atuarsimasunut, tamannalu peqqutigalugu toqqaannartumik ukiuni marlunni IB-mik ilinniartunngorsinnaanissaminnik akuerineqarsinnaanngitsut,
  • Nunat tamat atuarfianni (international skole) atuarsimasunut, kisiannili toqqaannartumik ukiuni marlunni pikkorissarnissamut piumasaqaataasunik angusisimanngitsunut

Pikkorissarneq ukiumik ataatsimik sivisussuseqarpoq ilinniarnertuunngorniarfimmilu ilinniarnermi ukioq siulleq naleqatigalugu (stx imaluunniit GUX)

Pre-IB-mi tunngaviusumik ilinniarneq ukiullu affaani siullermi ilinniakkatigut sammivik aaqqissugaapput, Pre-IB-miit stx-imi imaluunniit GUX-imi ilinniakkatigut sammivimmut nuuttoqarsinnaalluni – toqqagaq peqqissimissutigineqassagaluarpat. Taamaattoq ilaatigut killeqartitsisoqarsinnaammat isumassarsiatsialaassaaq ingerlatsinerup aallartinnerani ilinniarfiup oqaloqatiginissaa.

Stx -imut imaluunniit GUX-imut nuunniaraanni ilinniarfimmi ilinniartunngorsinnaatitaanermut piumasaqaataasut naammassisimasariaqarput, tak. ilinnialernissamut malittarisassat.

Namminersorlutik Oqartussat Danmarkimi Pre-IB -mi ilinniarneq ilinniagaqarnersiaqarfiusinnaasutut akuerinikuuaat