International Baccalaureate IB

International Baccalaureate (IB) tassaavoq Ilinniarnertuunngorniarfik tuluttut oqaluffiusoq.

 

Piviusut:

  • Sivisussusia: uk. 2
  • Ilinnialernissamut piumasaqaatit: 10./11. klasse atuarfimmi nunanut tamanoortumi
  • Qinnuteqarnissap killinga: 15. marts
  • Aningaasaqarneq: Ilinniagaqarnersiat 
  • Ilinniarnermi oqaatsit: Tuluttut
  • Paasissutissat: www.ibo.org imlt. www.ug.dk

IB Danmarkimi ilaatigut ukununnga ilinniarfittut neqeroorutaavoq :

  • Qallunaatut innuttaassuseqartunut ukiuni arlalinni nunani allani atuarsimasunut (Danamrkip Kalaallillu Nunaata avataani),
  • Inuusuttut qallunaatut innuttaassuseqanngitsut sivisunerusumilli Danmarkimiittut. 

Nunami allami qaffasinnerusumik ilinniarnissamik eqqarsaasersoruit IB aallaavissaalluarsinnaavoq. Ilinniarneq ingerlanneqartarpoq illoqarfinni ukunani: Birkerød, Grenå, Hellerup, Kolding, København, Nyborg, Næstved, Struer aamma Aalborg.

IB-mi ilinniartitsineq tuluttut ingerlanneqartarpoq. Atuartitsissutini sammiviit 6-upput ukuullutik:  

  • ilitsoqqussaralugit oqaatsit
  • allamiut oqaasii
  • inuaiqatigiilerinermut sammisut
  • pinngortitamik ilisimatusarneq
  • matematikki
  • ilinniartitsissutit toqqagassat,ilinniartitsissutit pilersitsiffiusut ilanngullugit

Sammivinniit tamaniit atuartitsissut ataaseq toqqassavat. Ilinniartitsissutit tamarmik ukiuni 2-ni ingerlanneqartarput.  

Ilinniartitsissutit ingerlanneqarsinnaapput qaffasinnertut (higher level) aamma naliginnaasumik qaffasissusilimmik (standard level). Qaffasinnertut ingerlatsineq qallunaat ilinniarnertuunngorniarfiini killiffik A- mut nallersuukkajuppoq, naliginnaasumillu qaffasissusilittut ingerlassat killiffik B-mut nallersuunneqartarlutik. Atuartitsissulli  "mathematical studies" killiffik C- mut nallersuuppoq. Atuartitsissutinik toqqaanermi piumasaqaataavoq minnerpaamik 3-ni imaluunniit 4-ni qaffasinnermik ingerlatsiviusumik toqqaanissaq.  

Piumasaqaataavoq ilisimatusarnermik teoriinik pikkorissarnermut (Theory of Knowledge) peqataanissaq, aamma annertunerusumik allallugu suliaqarnissat (Extended Essay). Kiisalu sapaatip-akunneri tamaasa akunnialunni pilersitaqarluni inooqatigiittullu sammisanut assigiinngitsunut peqataasarnissaq (Creativity, Action, Service) piumasaavoq.

Ilinnialernissamut piumasaqaatit qinnuteqarnerlu

Immersuilluni qinnuteqarfissaq ilinniarnertuunngorniarfinni ilinniakkamik neqeroorutilinni pisinnaavat tassanilu ilitsersorneqarlutit.

Ukiuni marlunni IB toqqaannartumik ilinnialernissamut piumasaqaataavoq 10. imaluunniit 11. klassip nunat tamat atuarfianni naammassisimanissaa. Aamma ilinniartunngortoqarsinnaavoq 1. g qallunaat STX -ianni imaluunniit kalaallit GUX-ianni naammassisimagaanni, tamannalu ilinniakkatigut sammivinnut tamanut atuuppoq.

Ilinniarfiup ilinniartuuffigisisavit pisariaqarsoriguniuk innersuussutigisinnaavaa akuerineqartinnak misilitseqqaarnissat. Tuluttut piginnaaneqarluartariaqarputit qallunaallu oqaasii naammiginartumik atorsinnaassariaqarlugit. Copenhagen International Schoolimili naammappoq tuluttut piginnaaneqarluarnissaq. IB-mik ilinniarfiit ataasiakkaat namminneq malittarisassaliortarput ilinniartunngortussanut piumasarisassaminnik, tassani pineqarlutik oqaloqatigiinnissamut aggersaaneq, karakteerinik piumasaqaatit, misilitsinnerni angusat allallu.  

Qinnuteqarfissap killigaa 15. marts. Ilinniarneq ukiut tamaasa augustimi aallartittarpoq.

Immersuilluni qinnuteqarfissaq ilinniarnertuunngorniarfinni taamatut neqeroorutilinni pissarsiarisinnaavat.

Aningaasaqarneq

Kalaallit Nunnaanni Namminersorlutik Oqartussaniit ilinniagaqarnersiuteqassaatit qaammammut 4.750 kr. Annertunerusumik paasisaqarsinnaavutit uani.

Ilinniarfimmi nerisanut ineqarnermullu aningaasartuutit nammineq akilissavatit. IB-mik ilinniarfiit ilaanni atuartitsinermut akiliuteqartoqartarpoq. Akiliuteqarfiusartumi ilinniartuussaguit illit nammineq akilertussaassavat.

Siunissami periarfissat

IB Danmarkimi nunanilu allani ingerlaqqiffiusumik ilinniarfinni ilinniartunngornissamut periarfissiivoq. Ilinniarnertuunngorniarfiit allat naleqqatigalugit ingerlaqqiffiusumik ilinniarfinni ilinnialissutaasinnaavoq.

IB-mik ilinniarsimallutit Danmarkimi bacheloritut ilinniarfimmut qinnuteqarniaruit eqqumaffigissavat karakteeritit IB-pointiniit 7-trinsskalamut nuunneqartariaqarmata. International Baccalaureate-mik (IB) soraarummeernermi angusat nuunnerisa naatsorsornerat.

Teknikkimut tunngasut pissutigalugit kingusinnerpaamik 15. marts qinnuteqassaatit, kvote 1 imaluunniit kvote 2 qinnutiginerat apeqqutaatinnagu.