Qanoq ilillutit qinnuteqassavit?

Inatsisinik tunngaveqartumik ilinniagaqarlernissamik akuerineqarneq, immikkut akuerisaaneq imaluunniit ilinnialernissamut misilitsinneq aallaavigalugit qinnuteqarniarpit?

Qinnuteqarfissaq www.sullissivik.gl
Qinnuteqarfissaq  Majoriaq

GUX-mut qinnuteqarneq internet-ikut pisarpoq una aqqutigalugu www.sullissivik.gl.

Kisianni NemID-qaruit immersugassaq una: Kalaallit Nunaanni ilinniagaqarnissamik qinnuteqaat aamma ilinniagaqarnersiuteqarnissamik qinnuteqaat immersoriarlugu nunagisanni Majoriaq – mut nassiussinnaavat. Imaluunniit immersugassaq ugguuna pissarsiaralugu Ansøgningsskema GUX-S

Meeqqat atuarfianni 2016-imi, 2017-imi imaluunnit 2018-imi inaarutaasumik misilitsissimaguit (FA)

Karakteeritut piumaqaataasut angusimagukkit inatsisinik tunngaveqartumik ilinniagaqalernissamik qinnuteqarsinnaavutit.

10. klassimi naliginnaasumik karakteeriliinerni tamani, aalajangersimasumik qulequtsiilluni suliami aammalu inaarutaasumik pinngitsoorani misilitsinnerni tamani minnerpaamik E angusimagukku, inatsisinik tunngaveqartumik ilinniagaqalernissamik akuerineqassaatit. Imaappoq akuerineqarnissat pinngitsoorani pissaaq.

Karakteerinni ataaseq-marluk inatsisinik tunngaveqartumik ilinniagaqalernissamik akuerineqarnissamut appasippallaarpata  inatsisit tunngavigalugit ilinniagaqalernissamik akuerineqarnissamik piumasaqaatasumut angusisimanngikkaluarlutit immikkut akuerissaanissamik qinnuteqarsinnaavutit.

Immikkut akuerineqarnissamik qinnuteqarsinnaavutit: 

  • Meeqqat Atuarfiannit inaarutaasumik misilitsinnermi (FA) karakteerini ataatsimi marlunniluunniit ANGUSINNGITSOORSIMAGUIT
  • Kisiannili Meeqqat Atuarfiannit inaarutaasumik misilitsinnerni atuartitsissutini kalaallisut, qallunaatut, tuluttut matematikkimilu karakteerigissaaruit.
  • Taamatut pisoqartillugu rektori immikkut akuersissutseqarSINNAAVOQ.

 Inatsisinik tunngaveqartumik ilinniagaqalernissamik akuerineqarnissamut piumasaqaatinut tunngatillugu immikkut akuersinikkut. Qinnuteqaatinnut inuttut kajumissutsit takutinniarlugu ilanngussaqarsinnaavutit.

Inatsisinik tunngaveqartumik ilinniagaqalernissamik akuerineqarnissamut karakteeritit appasippallaarpata meeqqallu atuarfiat 2016-imi imaluunniit 2017-imi naammassisimallugu, qinnutigisinnaavat ilinnialernissamut misilitsinneq aqqutigalugu ilinniartunngorumallutit.

Ilinniartunngorsinnaanissamut misilitsinneq aprilimi pisarpoq arlalinnillu toqqagassiilluni misiliinertut atuartitsissutini ukunani pisarluni: kalaallit, qallunaat tuluillu oqaasii, matematikki, pinngortitalerineq aamma inuiaqatigiilerineq.

Misilitsinneq 1 tiimimik sivisussuseqarpoq. Ilinnialernissamut misilitsinneq siusinnerpaamik meeqqat atuarfiani naammassinnereernerup kingornagut upernaakkut pisinnaavoq. Ilinnialernissamut misilitsinneq pisarpoq Majoriami, nunaqarfinni atuarfinni.

Qinnuteqartut Danmarkimiittut Kalaallit Illuini misilitsittarput. Misilitsinnermi angusingaluaruilluunniit akuerineqarnissat qulakkeersinnaanngilat ilinniarfinni inissaqassuseq apeqqutaasarmat.

2015-imi sioqqulluguluunniit meeqqat atuarfianni inaarutaasumik misilitsissimasunut (FA)

Ilinnialernissamut misilitsinneq aqqutigalugu qinnutseqassaatit.

AEU-mi ilinniarsimaguit

Ilinnialernissamut misilitsinneq aqqutigalugu qinnutseqassaatit.

Karakteeritit pitsanngorsarniarukkit  

Majoriaq pikkorissaanernik neqerooruteqartarpoq, karakteerivit pitsanngorsarnissaannik periarfissiiffiusunik. Majoriaq attavigiuk aqqutissiuussisumillu isumaqatigiissuteqarit.