Kigutigissaasoq (Tandplejer)

Kigutinik qanermillu passussineq saliinerlu suliarerusuppigit?

Ilinniakkap normua: 272124

 

Piviusut

  • Sivisussusaa: uk. 2
  • Qinnuteqarfissap killinga: 1. marts
  • Aningaasaqarneq: Ilinniarnermi akissarsiat
  • Ilinniarfik: Peqqissaanermik Ilinniarfik, Nuuk
  • Paasissutissat: www.pi.gl

Kigutigissasutut ilinniakkami kigutigissaanerup iluani peqqissutsimik siuarsaanermik nappaatinillu pinaveersaartitsinermik suliaqarnissamut ilinniartinneqassaatit.

Aammattaaq kigutigissaanerup iluani killilimmik katsorsaanikkut aaqqissugaanermilu suliassat  isumaginissaannik ilinniartinneqassaatit.

Malugiuk. Nunatsinni kigutigissaasumut ilinniarneq sanilliunneqarsinnaanngilaq qallunaat nunanni kigutigissaasunngorniarnissamut ilinniarnermut.

Ilinniarnerup ingerlanera

Ilinniagaq ukiunik marlunnik sivisussuseqarpoq, tassaallu kigutileriffimmi sungiusarluni sulineq aamma Nuummi Peqqissaanermik Ilinniarfimmi sapaatip-akunneri arfineq-pingasukkaarlugit pingasoriarluni ilinniarneq. Ilinniarfimmiinneq kingulleq soraarummeernermik naggaserneqassaaq.

Saniatigut sungiusarluni sulinerup nalaani sapaatip-akunnerini sisamani ungasianiik ilinniartitsisoqassaaq. Ilinniagaq katillugit sapaatip-akunnerini 36-ni teoriinik ilinniarfiuvoq. 

Sapaatip akunneranut akunnerni marlunni timersorneq atuagarsornermut ilaavoq. 

Sungiusarluni sulineq

Sungiusarluni suliffissat katillugit 10-12-iupput. Majoriaq sulisitsisorlu peqatigalugit lærlingitut isumaqatigiissusiortoqassaaq.

Sungiusarluni sulineq illoqarfigisanni kigutileriffimmi ingerlanneqassaaq.

Sungiusarlutit sulinerpit nalaani ilitsersuisoqassaatit attaveqaateqarlutillu.

Ilinnialernissamut piumasaqaatit qinnuteqarnerlu

Ilinnialissagaanni piumasaqaatit makkuupput:

  • Ilinniarnertuutut soraarummeersimaneq imaluunniit
  • Kalaallit Nunaanni klinikassistentitut naammassillugu ilinniarsimaneq
  • Kigutileriffimmi sungiusarluni suliffisamik qularnaarisimaneq

 

 

Siunissami periarfissat

Kigutigisaasutut naammassisimaguit Kalaallit Nunaanni, Danmarkimi nunaniluunniit allani kigutileriffinni sulilersinnaavutit, kigutigissaasut assut amigaataammata.

Aningaasaqarneq

Ilinniarneq tamaat ilinniartutut akissarsiaqassaatit. Annertunerusumik paasisaqarit uani.

Attavissaq

Peqqissaanermik Ilinniarfik
Tlf.: (+299) 34 99 50
E-mail: pipost@nanoq.gl