Tapersersorti (Støtteperson)

Isumassuineq nuannariviuk, aamma innuttaasut annertuumik ajornartorsiutillit tapersersorumavigit?

Ilinniakkap normua: 272116

 

Piviusut

  • Sivisussusaa: uk. 1½
  • Qinnuteqarfissap killinga: 1. marts
  • Aningaasaqarneq: Ilinniagaqarnersiutit 
  • Ilinniarfik: Peqqissaanermik Ilinniarfik, Nuuk
  • Paasissutissat: www.pi.gl

Tapersersortitut innuttaasumut tarnikkut nappaatilimmut isumassuisuullutillu tigussaasutigut ikorfartortaavutit. Tassuunakkut sapinngisamik annertunerpaamik nalinginnaasumik inuuneqarnissaannut ikiussavatit. 

Innuttaasoq sapinngisamik annertunerpaamik inuunerissaaqqullugu, innuttaasoq ulluinnarni imminut napatissinnaanermi ataavartinnissaanut inerisarnissaanullu ikiorlugulu tapersersussavat. Ulluinnarni suliassat isumaginissaannut ilinniartinneqassaatit. 

Ilinniagaq inersimasunik tarnikkut nappaatilinnik sullissinissamik tunaartaqarpoq. 

Ilinniarnerup ingerlanera

Ilinniarneq ukiup aappaa affarmik sivisussueqarpoq, sapaatip-akunnerini 38-ni atuagarsornermik 35-nilu sungiusarluni sulinermik katitigaalluni.

Ilinniarfimmiinnerit Nuummi Peqqissaanermik Ilinniarfimmi pisarput, pingasuullutillu, taakkunanngalu kingulleq inaarutaasumik soraarummeerfiussaaq.

Sungiusarluni sulineq isumaginninnermi illoqarfigisanni tarnikkut katsorsaanerup iluani ingerlanneqassaaq.

Sungiusarlutit sulinerpit nalaani ilitsersuisoqartinneqassaatit Peqqissaanermilu Ilinniarfimmi attavigisartagaqassallutik.

Sapaatip akunneranut akunnerni marlunni timersoneq atuagarsornermut ilaavoq. 

Ilinnialernissamut piumasaqaatit qinnuteqarnerlu

Ilinnialernissamut makku piumasaqaataapput:

  • Meeqqat atuarfianni inaarutaasumik misilitsissimaneq kisitsinermi/matematikkimi minnerpaamik E (02) karakteereralugu aamma kalaallit qallunaallu oqaasiini minnerpaamik D (04) karakteereralugu
  • Minnerpaamik 18-inik ukioqarnissaq
  • Minnerpaamik ukiuni marlunni sulinermik misilittagaqarnissaq
  • Ilinnialernissamut atatillugu oqaloqatigineqarsimanissaq
  • Pinerluuteqarsimannginnermik uppernarsaateqarnissaq

Ukiumut ilinniaqatigiit ataatsit augustimi aallartittarput.


 

 

 

 

Siunissami periarfissat

Tapersersortitut ilinniarsimaguit peqqinnissaqarfimmi sulilersinnaavutit.

Aningaasaqarneq

Sungiusarlutit sulininni ilinniarfimmiinninnilu ilinniagaqarnersiuteqassallutit. Annertunerusumik paasisaqarit uani.

Attavissaq

Peqqissaanermik Ilinniarfik
Tlf.: (+299) 34 99 50
E-mail: pipost@nanoq.gl