Piniarnermut aalisarnermullu nakkutilliinermik ilinniarneq

Ilinniakkap normua: 372022

Kalaallit Nunaata Aalisarsinnaanermut akuersissutinik Nakkutilliisoqarfiata suliassaqarfii aallaavigalugit Piniarnermut Aalisarnermullu nakkutilliinermik ilinniarfik sulisunut ilisimasanik, pisinnaasanik, piginnaasanik isummanillu tunniussinissamik siunertaqarpoq, taamaasillutik sulisut piniarnermut aalisarnermullu nakkutilliisutut inuttullu oqartussatut atuuffimminnik suliassatigut pitsaanerpaamik piginnaasatigullu qaffasissusilimmik naammassinnissinnaalersinneqassapput Aalisarsinnaanermullu akuersissutinik Nakkutilliisoqarfiup anguniagaanik nakkutigisassaanillu naammassinninnissaanut sunniuteqaqataassapput.

 

Piniarnermut Aalisarnermullu nakkutilliisut - nakkutilliinermik ilinniarfiata peqataasut aalisakkat, aalisarneq, uumasut nujuartat, uumasoqarfiit aamma piniarneq pillugit ilisimasanik pissutsinillu arlalinnik paasinnilersissallugit siunertaraa, matumani aamma:

•     Suliassaqarfinni taakkunani inatsisaasut malittareqqusat ilisimalernissaat. 

•     Peqataasut tamarmik inuttut oqartussaaneq aamma innuttaasut naapinnissaat kiisalu eqimattani/suleqatigiinni sulisinnaanissaq aaqqiagiinngissutinillu suliaqartarnermut sakkussat pillugit tunngaviusumik ilisimasanik tunineqarnissaat.

•     Aalisarsinnaanermut akuersissutinik nakkutilliisoqarfiup akisussaaffigisaani nakkutilleeriaatsinik tamanik eqqortumik namminersortumillu pilersaarusiornermi, naammassinninnermi nalunaarusiornermiluunniit peqataasut ilisimasariligaannik, pisinnaasariligaannik isummallu pissarsiarisimasaannik atuisinnaalersinnissaat.

       Peqataasut ilaatigut EU-mi aalisarnermik nakkutilliinermut tunngatillugu ileqquusunik ilaatigullu nunanik nakkutilliinermut tunngasutigut suleqatigineqartunik immikkut ilisimasaqalersitsisumik nunani tamalaani ilinniakkat qaffasissusaannut naapertuuttumik qaffasissusilimmik ilinniagaqarnissaannik qulakkeerinninneq.