EUD

Inuutissarsiummik ilinniarneq sunaava sumullu atorsinnaava.

Inuutissarsiummik ilinniarneq sunaava?

Inuutissarsiummik ilinniarneq (EUD) tigussaasutigut ilinniarneruvoq, inuutissarsiutinut aalajangersimasunut sammisoq. Assersuutigalugu tassaasinnaapput assassorissanik, allaffimmi imarsiortutulluunniit ilinniakkat. Ilinniarnermi ilinniarfimmiinneq sungiusarlunilu sulineq paarlakkaanneqartarput, ilinniarnerillu sivisussaat nikerarlutik, nalinginnaasumik ukiumit ataatsimiit ukiunut tallimanut. Ilinniakkat ilaat Kalaallit Nunaanniinnaq pisarput, allalli ilaannakortumik tamakkiisumilluunniit Danmarkimi ingerlanneqartarlutik. Inuutissarsiummik ilinniagaqalissaguit, qitiusumik ilinniarfimmi ilinniartussatut akuerisaasariaqarputit, tunngaviatigullu sungiusarlutit suliffissannik nassaarsimasariaqarlutit.

Sooq inuutissarsiummik ilinniarneq toqqassavara?

Inuutissarsiummik ilinniarnermi pissanganartorpassuaqarpoq, inuutissarsiummi soqutigisanni sulilernissaannut piginnaanngorsaatigisinnaasannik. Inuutissarsiummik ilinniarnikkut suliffissaqalersinnaanerit pitsanngorsassavat, immaqalu sivikitsumik ingerlaqqiffiusumik ilinniarnissaq piareersarfigisinnaallugu. Suliamut atatillugu annertuumik inerikiartussaatit, taamatulli aamma inuttut inooqatigiissutsikkullu annertoqisumik inerikkiartussallutit.

Inuutissasiummik ilinniartumit suut ilimagisaappat?

Inuutissasiummik ilinniartutut ulluinnarisaq meeqqat atuarfianni sungiusimasannut sanilliullugu allaanerusoq ilimagisinnaavat. Inuutissarsiummik ilinniakkami teknikkikkut, assassornikkut pilersitsisinnaanikkullu ilisimasat tungaasigut annertuumik piumasaqarfigineqassaatit. Inuutissasiutinik ilinniakkat ilaat teknikkimut samminerupput allallu pilersitsinnaanermut samminerullutik. Inuutissarsiummik ilinniassaguit imaassinnaavoq illoqarfimmut allamut nuuttariaqartutit. Tamatuma nassatarissavaa inuit nutaarpassuit naapissagakkit nutaanillu ikinngutitaartorlutit, ilinniarninni aamma kollegiami. ”Ilinniartutut inuunerup” ataani ilinniakkap aallartinnera pillugu paasissutissat takusinnaavatit. Aamma ilinniartutut ulluinnarni inuuneq pillugu tassani atuagassaqarpoq.